(వందేళ్లైనా అల్లూరి మృతి రహస్యాన్ని ఛేదించలేమా? కథనం రెండో భాగం ఇది ) బురుజు.కాం Buruju.com ప్రతినిధి: అల్లూరి సీతారామరాజు 1924, మే 7వ తేదీన మృతి చెందినట్టుగా బ్రిటీష్ ప్రభుత్వం అదే నెల 16వ తేదీన అధికారికంగా ప్రకటించింది. సాయుధ పోలీసుల అధీనం నుంచి ఆయన తప్పించుకొని పారిపోయే క్రమంలోనే ఆయన్ని కాల్చివేసినట్టుగా తెలిపింది. అల్లూరి మరణించారంటేనే విశ్వసించని ప్రజానీకం.. ఆయన తప్పించుకొని పారిపోతుండగా కాల్చివేశామంటూ చెప్పటంతో అల్లూరి నిజంగానే తప్పించుకొని ఎక్కడో సజీవంగా ఉన్నారేమోనని భావించారు. అల్లూరికి బదులుగా బ్రిటీష్ సైనికులు వేరొకరిని కాల్చివేసి ఉండొచ్చనే అంచనాకు వచ్చి.. ఏనాటికైనా అల్లూరి తిరిగి ప్రత్యక్షమవుతాడని ఎదురు చూస్తూ వచ్చారు. ఆయన మరణంపై నాటి కొన్ని పత్రికలు లేవనెత్తిన సందేహాలకు బ్రిటీష్ ప్రభుత్వం సమాధానాలు ఇవ్వలేదు. అల్లూరి చనిపోయిన తర్వాత చట్ట ప్రకారం చేపట్టాల్సిన శవ పంచానామా, పోస్టుమార్టం వంటి వాటి నివేదికలను బయటపెట్టలేదు. కనీసం పంచానామాను చేసిందీ లేనిది కూడా చెప్పలేదు. నాటి బ్రిటీష్ అధికారుల ఇటువంటి వైఖరి కారణంగానే బ్రిటీష్ వారు బయటపెట్టిన మృత దేహం ఫొటో అసలు అల్లూరి సీతారామరాజుది కానేకాదంటూ రాజమండ్రీ నుంచి వెలువడిన ‘కాంగ్రెస్’ ప్రతిక ఘాటుగా రాయగలిగింది. బ్రిటీష్ వారు విధించే జైలు శిక్షలను ఏమాత్రం లెక్కచేయకుండా స్వాతంత్య్ర ఆంకాక్షను నిర్భయంగా బహిర్గతం చేస్తూ వచ్చిన యువకిశోరం మద్దూరి అన్నపూర్ణయ్య.. ఆ ఫొటో రామరాజుది కానేకాదంటూ అప్పట్లో పేర్కొన్నారు. ఆయన ‘కాంగ్రెస్’ పత్రికకు సంపాదకులుగా ఉండేవారు. కాకినాడ పీఆర్ హైస్కూలులో. . సీతారామరాజు చదువుకొన్న సమయంలోనే ఆయనా చదివారు. పోలీస్ అధికారులు వెల్లడించిన ఫొటో రామరాజుది కాదంటూ అప్పటికే తన వద్ద గల ఆయన చిన్ననాటి ఫొటోతో సరిపోలుస్తూ అన్నపూర్ణయ్య 1926, జూలై 16వ తేదీ ప్రత్యేక సంచికలో కథనం రాశారు. అంతేకాదు.. కొందరు ప్రముఖుల అభిప్రాయాలనూ తన వాదనకు బలం చేకూరేలా ప్రచురించారు. ఆ సంచికను అల్లూరి సీతారామ రాజు జయంతి ప్రత్యేక సంచికగా వెలువరించారు. సీతారామ రాజుపై ప్రత్యేక సంచిక వెలువడుతున్నట్టుగా తెలుసుకొన్న పోలీసులు దానిని బయటకు రాకుండా చేయటానికి చాలా ప్రయత్నించారు. పత్రిక కార్యాలయంలో సోదాలను నిర్వహించారు. అనాడు ఏమి జరింగిందీ అదే పత్రికకు కొన్ని పర్యాయాలు సంపాదకుడిగా వ్యవహరించిన క్రొవ్విడి లింగరాజు తన ‘గౌతమి సత్యాగ్రహ ఆశ్రమం’ అనే గ్రంధంలో వెల్లడించారు. ‘‘ ఆ సంచికలో అల్లూరి చిన్ననాటి బొమ్మను, ప్రభుత్వం తాము చంపినట్టుగా ప్రకటించిన బొమ్మను అచ్చువేశాము. ఆ రెండు బొమ్మలు ఒకరివి కావని రుజువు చేసే శాస్త్రజ్ఞు‌ల అభిప్రాయాలను ప్రకటించాము’’ అని పేర్కొన్నారు. అల్లూరి చనిపోయిన దాదాపు రెండేళ్లకు ఈ సంచిక వెలువడింది.

పట్టుబడిన తర్వాత పారిపోతుండగా అల్లూరిని కాల్చివేసినట్టుగా 1924 నాటి మద్రాస్ ప్రెసిడెన్సి పరిపాలన నివేదికలో నాటి ప్రభుత్వం పేర్కొంది. అల్లూరి 1924, మే7వ తేదీన పట్టుపడ్డాడని వెల్లడించినప్పటికీ ఎప్పుడు పారిపోయే ప్రయత్నం చేసింది, ఎప్పుడు కాల్చివేసిందీ ఈ నివేదికలో తెలపలేదు. నివేదికలోని 145వ పేజీలోని 10వ లైను నుంచి కేవలం నాలుగు లైన్లలోనే ఆయన గురించి చెప్పి ఆయన మరణం తర్వాత గ్రామస్తులంతా తమకు సహకరిస్తూ వచ్చినట్టు రాసుకొన్నారు.

అల్లూరి పిరికి పందలా పారిపోతుంటే కాల్చిపడేశామనే ధోరణిలో బ్రిటిష్ ప్రభుత్వం ప్రకటన ఉండటం వల్లనే అన్నపూర్ణయ్య ఇటువంటి కథనాలను రాయవలసివచ్చినట్టుగా స్పష్టమవుతోంది. ఈ సంచిక వెలువడిన తర్వాత అన్నపూర్ణయ్యపై బ్రిటీష్ పాలకులు వివిధ రకాల కేసులను నమోదు చేసి కొంత కాలం ఖైదు చేశారు.అప్పట్లోనే ‘శారద’ పత్రిక ఇలా రాసింది.. ‘‘ సీతారామరాజు మరణం గురించి ప్రజల్లో ఎన్నో అనుమానాలు ఉన్నాయి. ప్రభుత్వం అతన్ని 7వ తేదీన పట్టుకొనినను 16వ తేదీ వరకు ఆవిషయాన్ని తెలపలేదు. అప్పుడైననూ.. పారిపోవుటకు ప్రయత్నించగా 8వ తేదీన కాల్చివేయబడెనని ప్రకటించారు. ఆ ఆలస్యానికి కారణం ఏమిటి? ఈ 9 రోజుల వ్యవధిలో కార్యరంగంలో ఉన్న అధికారులకు , ప్రభుత్వానికి మధ్య ఏమి ఉత్తర ప్రత్యుత్తరములు జరిగినవి? రాజు వంటి పెద్ద పితూరి నాయకుడు ప్రభుత్వ వశములో ఉండగా పోలీసు నిర్భందం నుంచి అతను ఎలా తప్పించుకొనుటకు ప్రయత్నించెను? పోలీసులు కాల్చటం వల్ల అతనికి ఎన్నిగాయాలు తగిలెను? ఎచ్చట తగిలెను? శవపరీక్ష జరిపి పంచాయతీ జరిపించారా? అయినచో ఆ శవ పంచాయతీ నివేదికను ప్రభుత్వం ఎందుకు వెల్లడించలేదు? రాజు మరణ వార్తను కొంతమంది నమ్మటంలేదని పత్రికలు ప్రకటించుచున్నవి. అందుచే ఈ విషయంలో సకల వివరాలను వెల్లడించటం ప్రభుత్వం విధి’’ అని నిలదీసింది.

అల్లూరి జన్మించిన విశాఖ జిల్లా పాండ్రంగిలో నిర్మించిన స్మారక మందిరం గోడపై ఆయన జీవితంలోని ప్రధాన ఘట్టాలను ఇలా వివరించారు.

హిందూ పత్రిక 1924, జూలై 24వ తేదీన ‘‘ సీతారామరాజు మరణించినాడా? అని గోదావరి జిల్లా కాంగ్రెస్ కమిటీ అనుమానించుచున్నది’ అనే శీర్షికతో ఒక కథనం రాసింది. దీని ప్రకారం.. నాటి జిల్లా కాంగ్రెస్ కమిటీ సీతారామరాజు పోరాట మార్గాన్ని వ్యతిరేకిస్తూనే.. ఆయన దేశభక్తిని ప్రశంసిస్తూ ఒక తీర్మానం చేసి.. అంతలోనే అసలు ఆయన మరణించనేలేదని ప్రజలు అనుకొంటుంన్నందున తీర్మానం అనవసరమని భావించింది. చేసిన తీర్మానాన్ని ఉపసంహరించుకొంది. రాజు మరణంపై శాసన మండలిలో కొందరు అడిగిన ప్రశ్నలకు ప్రభుత్వం గోడమీద పిల్లి వాటం మాదిరిగా జవాబు ఇచ్చిందని ‘హిందు’ పత్రిక విమర్శించింది. ప్రస్తుతం రాజు బతికి ఉన్నాడా? మరణించాడా? అనేది ముఖ్యం అని పేర్కొంది. రాజు పోరాటం చేసిన కాలంలో ఆయన పంథాను విమర్శించిన పత్రికలు.. ఆ తర్వాత మాత్రం కొంత గట్టిగానే ప్రభుత్వాన్ని నిలదీసే ప్రయత్నంచేసినా.. పాలకుల నుంచి సరైన సమాధానం లభించలేదు. ( ‘అల్లూరిని చంపిన మేజర్ గుడాల్.. సెలవుపై ఎందుకు వెళ్లినట్టు?’ .. మూడో భాగం వచ్చేవారం)