బురుజు.కాంBuruju.com ప్రతినిధి: ఉభయ తెలుగు రాష్ట్రాల్లోను వయోధికుల సంఖ్య గణనీయంగా పెరగబోతోంది. ఇదే సమయంలో.. వివిధ కారణాల వల్ల వారిలో మూడో వంతు మంది పోషకాహార లోపంతో బాధపడనున్నారు. వారికి పోషకాహారంతో సహా మరికొన్ని కార్యక్రమాలను అందుబాటులోకి తెచ్చేందుకు సరికొత్త పథకాలు ఇప్పుడు అత్యవసరం. వారికి రోజువారీ ( డే కేర్ ) కేంద్రాల నిర్వహణ వంటి పలు సిఫార్సులతో కూడిన జాతీయ కార్యాచరణ ప్రణాళికను తెలంగాణ, ఆంధ్రప్రదేశ్ రాష్ట్రాలు వెంటనే అమల్లోకి తేగలగాలి.

పిల్లలు వలస వెళ్లిపోతుండటంతో గ్రామాల్లో ఒంటరిగా మిగిలి పోతున్న వయోధికులు. సమీప భవిష్యత్తులో గ్రామాల్లో 70 శాతం మేర ఇటువంటి వృద్దులే కనిపించనున్నట్టు సర్వేలు చెబుతున్నాయి

కేంద్ర జనాభా అంచనాల సాంకేతిక బృందం లెక్కల ప్రకారం 2021 నాటికి దేశ మొత్తం జనాభాలో 60 ఏళ్లు నిండిన వయోధికులు 10.1శాతం ( 13.74 కోట్లు) మేర ఉండగా 2036 నాటికి వారు 14.9 శాతానికి ( 22.74 కోట్లు) చేరతారు. ఉభయ తెలుగు రాష్ట్రాలను తీసుకొంటే.. 2026 నాటికే ఇక్కడి మొత్తం జనాభాలో వయోధికులు 14.2 శాతం మేర ఉంటారు. వీరి సంఖ్య 2011లో 10.5 శాతం ఉండేది. మరో వైపు.. కేంద్ర ఆరోగ్య, కుటుంబ సంక్షేమ శాఖ.. ఇటీవల వయోధికుల జీవిత కాలంపై నిర్వహించిన ఒక సర్వే ప్రకారం.. వయోధికుల్లో 27 శాతం మంది పోషకాహార లోపంతోను, మరో 22 శాతం మంది స్థూలకాయంతోను బాధపడుతున్నారు. అంటే.. కొంత మందికి సరైన ఆహారం లభించకపోతుండగా.. మరికొందరు అవసరానికి మించి తింటూ ఒళ్లును పెంచుకొంటున్నారు. రెండు రకాల సమస్యలపైనా పాలకులు దృష్టి సారించటం తప్పనిసరి.

చేయూత కోసం ఇటువంటి ఎదురు చూపు దృశ్యాలు అన్ని చోట్లా కనిపిస్తూనే ఉంటాయి

వయోధికులు ఎదుర్కొంటున్న ఇబ్బందులకు అనుగుణంగా వారి ఆర్థిక భద్రత, ఆహారం, ఆరోగ్యం, జీవన గౌరవం వంటి అంశాల మేళవింపుతో జాతీయ కార్యాచరణ ప్రణాళికలను కేంద్రం ఏటా రూపొందిస్తున్నప్పటికీ వాటికి అనుగుణంగా తెలుగు రాష్ట్రాలు స్పందించటంలేదు. జాతీయ ప్రణాళికను ఆదర్శంగా తీసుకొని రాష్ట్రాలూ సొంత ప్రణాళికలు తయారు చేసుకోవాలని కేంద్రం చెబుతోంది. వృద్ధాశ్రమాల నిర్వహణ వంటి వాటికి కొంత మేర గ్రాంటులను కేంద్రం ఇస్తున్నా తెలంగాణ, ఆంధ్రప్రదేశ్ రాష్ట్రాలు వాటినీ పూర్తి స్థాయిలో వినియోగించుకోవటంలేదు. కేంద్ర 2020-21 కార్యాచరణ ప్రణాళిక ప్రకారం.. వివిధ వర్గాల వారి నుంచి ఔషధాలను సేకరించి వాటితో మెడికల్ బ్యాంకులను రాష్ట్రాలు ఏర్పాటు చేయాలి. అవసరమైన వయోధికులకు ఆయా బ్యాంకుల నుంచి మందులను ఉచితంగా అందజేయాలి. *సమీప భవిష్యత్తులో.. వయోధికుల్లో 70 శాతం మంది గ్రామీణ ప్రాంతాల్లో నివసిస్తుంటారని అంచనా. కుటుంబంలోని యువతీ,యువకులు ఉపాధి కోసం వలస వెళ్తుండటం వల్ల , గ్రామాల్లోని వైద్య సేవల్లో నాణ్యత కొరవడటం వల్ల వృద్దుల‌ సమస్యలు చాలా దారుణంగా ఉంటాయని జాతీయ కార్యాచరణ ప్రణాళికలో కేంద్రం హెచ్చరించింది.

వయోధికుల కోసం స్వచ్ఛంద సేవా సంస్థలూ ముందుకు రావాలి

*ప్రణాళికలోని హెచ్చరికలు, సూచనల ప్రకారం.. వయోధికుల్లో 80 ఏళ్లు దాటినవారి పరిస్థితి మరీ దయనీయంగా ఉండబోతోంది. వృద్దులు.. వాహనాల్లో ప్రయాణించి పట్టణాల వరకు రావటం చాలా కష్టం కనుక వారి కోసం సంచార వైద్య శాలల్ని ఏర్పాటు చేయాలి. సంచార వైద్య శాలల్లో హోమియోపతి, ఆయుర్వేదం వైద్యాలకూ స్థానం కల్పించాలి. వీటిని నిర్వహించేవారికి గ్రాంటులను అందజేయాలి. రోజువారీ (డే కేర్) సంరక్షణ, ఆరోగ్య రక్షణ కేంద్రాల కోసం నిధులను మంజూరు చేయాలి. *వయోధికులతో స్వయం సేవా సంఘాలను నెలకొల్పాలి. సంబంధిత ఇతర పథకాలకు వయోధికుల పథకాలను అనుసంధానం చేయాలి. అపార్టుమెంట్లలోని గ్రౌండ్ ఫ్లోర్లలో వారికి ఫ్లాట్లను కేటాయించేలా మాస్టర్ ప్లాన్లలో మార్పులతో సహా పలు అంశాలను జాతీయ కార్యాచరణ ప్రణాళికలో కేంద్రం పొందుపర్చింది. *వృద్దుల‌ రోజువారి సంరక్షణ కేంద్రాలుగా మారే భవనాలకు విద్యుత్తు, అస్తిపన్ను, మంచినీటి బిల్లులను రద్దు చేయటం, ఇటువంటి కేంద్రాల వద్ద అంబులెన్సు సదుపాయాలను ఏర్పాటు చేయటం వంటి పలు ఆకర్షనీయ అంశాలెన్నో ప్రణాళికలో ఉన్నాయి. కేంద్రం చేసిన ఇటువంటి సూచనలకు రాష్ట్రాలు మరింత మెరుగులు దిద్ది స్థానిక అవసరాలకు అనుగుణమైన కార్యక్రమాలకు రూపకల్పన చేసినట్లైతే వయోధికులకు కొంతైనా ఊరట లభించగలుగుతుంది. *తెలుగు రాష్ట్రాల్లో మరో విశేషమేమిటంటే.. 2026 నాటికి మొత్తం జనాభాలో.. వయోధిక పురుషులు 13.5 శాతం .. వయోధిక మహిళలు 15 శాతం మేర ఉంటారు. 2011 జనాభా లెక్కల ప్రకారం అప్పటికి 60 ఏళ్లు నిండిన వారు ఉమ్మడి రాష్ట్రంలో 83 లక్షల మంది ఉండగా.. వారిలో 44 లక్షల మంది మహిళలు ఉన్నారు. వయోధికుల సంఖ్యాపరంగా అప్పట్లో ఆంధ్రప్రదేశ్.. దేశంలో మూడో స్థానంలో నిలిచింది. ఆరోగ్యం పట్ల అవగాహణ పెరగటం తదితర కారణాల వల్ల జీవిత కాలం ఇప్పుడు క్రమేణా పెరుగుతూనే సమస్యలూ వెంటాడుతున్నాయి.